زوَّادة طَبيعيّة: التراب
لمّا منروح بالطّبيعة، منلاقيه هونيك ومنقول: سبحان ألله!
لمّا منرجع عالبيت بدنا نفوت عالبيت، منّفّض إجرَينا منّو!
مَحل ما موجود، وبيلحقو شويّة مَي، بيعطي خَضار.
إذا كان سميك، بتِكبَر الشّجرة!
وإذا كان رقيق، بتيبس العشبة!
لمّا الواحَد بيتغرَّب عَن الوطن: بيقول: مشتاق شِمّ ريحة ترابك يا وَطَني!!
بيضَلّ بالرّغم من كل شي، بالأرض! متواضِع، بيقبَل يندعس كرمال يعطي حياة!
هالتّراب، قَد ما مندعّس عليه، بيضَلّ مهمّ!
قَد ما بتعطيه بيعطيك!
فاتح قلبو تا يستقبل كل شي مِنّك!
كل ما تعتني فيه، هوّي بيعتني فيك!
خَلّونا اليوم، من التراب ناخُد زوّادة لحياتنا، ونتعلّم التّواضع وتحمّل الأوجاع، والآلام كرمال نِقدِر نَعطي ثمار.
ونخَلّي كل شي بيصير معنا، مصدر حياة مثمرة.
نهاية أسبوع مباركة
وألله مَعكن.
