زوادة اليوم

إنتَ ”مصمِّم إعلانات”؟ بتشتغل بِمجال الإعلانات؟
إعلانات مَرئيّة أو مَسموعة؟ صورة أو متحرّكة؟
دَورَك مهمّ! 
بإيّامنا، صار في للأسف 3 عناصر جذب إنتباه مشهورين: الجنس! المال! والسّلطة!
يمكن تِضحَكوا! بس هَيدا الواقع! شو خَصّ الصبيّة المزلّطة بالسّيّارة الجديدة؟
أو شباب اللي عَم يعملولي عَرض لَعضلاتُن بِدعاية بسكوت عا شوكولا؟ 
أو بَدَّك تطَلِّع 1400$ بأسبوع؟ وما بِتْهِمّ الطَّريقة كيف! 
الإعلان مهمّ وحلو! بس غايتو صارت بشعة والوسيلة أبشَع! 
يسوع، بإيَّامو، كان يَعمِل دعاية! كان يبعَت تلاميذو يخَبّروا بالمدن أنّو جايي يسوع!! 
بسّ الأهم اللي بَلَّش يتغَيَّر، أنّو صيت يسوع وأعمالو الحلوة صارت تِسبَقو وتَعملّوا دعاية!
كرمال هيك اليوم بتوجَّهلَك بهالكلمة: جَسَدنا مقدَّس، إن كان لابس وإن كان مزلَّط! المال مهم بَس الوسيلة النضيفة هيّ الأهمّ! حلو تتدرّج وتصير بِمَوقع المسؤوليّة، بس بِجدارتَك! مش ضروري يكونوا هالإشياء وسيلتَك لَجذب الانتباه! كون خلّاق بأفكارَك وما تمشي بِتيّار العالم اللي عم بيصير أوسَخ وأوسَخ.
هَيدي دَعوتَك: 
وَصِّل رسالتَك من دون ما تستخدم “الأوساخ” لأنّو الوَسَخ بيجذب الوحوش البرّيّة!!!
نهار مبارك للكلّ ولمُصَمّمي الإعلانات خاصَّةً.
وألله معكن